Egunkari maitea,
eguberri bezperaren goizean whatsapp bat jaso nuen, Gontzal Mendibilena, eta ene bihotzeko laino tristeak une batez kendu zituen bere berri onaren izpi epelekin. 2012ko ene poema-liburuko olerki bat musikatu du:
PSIKOLOGOA ETA ILE-APAINTZAILEA PERTSONA BERA OTE?
Maitasuna dagoelarik
ez dago galderarik, ez zergatirik,
eta maite zaitut hargatik.
Bizitza onarpena dela
erran dit ile-apaintzaileak,
onartzea,
dagoena onartzea eta kitto,
eta egunekoa bizi besterik ez dudala.
Onartzea,
nik bertze inor baino gehiago
maite zaitudala,
eta era berean onartzea
zu ni gabe ere bizi zarela,
nik bizirauteko, hats hartzeko
zuretik behar badut ere edan.
Egunean egunekoa bizi,
eta ospatu gaurko eguna.
Bizitzak ezusteak ere ematen dituela
erran dit ile-apaintzaileak,
eta gutxien espero dudalarik
agian bigarren aukera hobe bat edukiko duela gureak.
Bizitzak ezusteak eman ohi ditu
eta ni onarekin gelditzen naiz,
zuk eman didazuna, ene maite,
onena izan baita, onena izan zara,
niretzat egina bezala.
Horixe gaurkoa:
ile-apaintzaile psikologoak apain jartzeaz gain,
ilea, dirua eta pisua kendu dit,
eta ez soilik pisu materiala.
Ni lasaitu naiz.
maya's space 
Emozioen hiztegian
negatibo Tristura nauzu
atsekabez, malenkoniaz, maiteminez, herriminez, gogoezaz nagoelako.
Emozioen hiztegian
positibo Maitasuna nauzu
zuganako estimua, adiskidetasuna, bihozberatasuna, maitemina, onarpena, eskerrona, begirunea dudalako.
Emozioen hiztegian
anbiguo Itxaropena nauzu
nahi edo desiratzen dudana
beteko dela sinesten dudalako.